16 - Varon, Magg, Balestrer, Tanz e Parin

Carlo Porta (1775–1821)

Poesie

Varon, Magg, Balestrer, Tanz e Parin,cinqu omenoni proppi de spallera,gloria del lenguagg noster meneghin,jesuss! hin mort, e inscì nol fudess vera.

Ma s’hin mort sti torcionn de tanc stoppinnanch per quest se pò dì ch’emm fornii breragh’emm anmò pizz on fior de lanternincoj reverber e i veder de minera.

Gh’emm on Pader Garion, Domenican,viv vivent ch’el Signor ne l’ha daa appostaper conservà la gloria de Milan;

inscì nun meneghitt con sto brav ommgh’emm i sett maravej tutt in cà nosta:i primm cinqu, lu che ses, e sett el Domm.