El consulto medico

L'ano mile siecento e otantadò,El mese lo dirò,El dì no me ricordo,Un medico balordo,Che la so gran bravura,I so talenti,Consisteva in vestir co cargaduraDa impatarghela afato a un cavadenti,Da darghe scacomatoA un bufo caricato,Come saria, veladaA fiori ricamada,Longa de vita e streta,Co una mua de botoniContornai de zergoni,E de sta peta,

Camisiola de raso coi lustrini,Braghesse curte, fiube ai centurini,Calze bianche de sea, scarpe impontie,Che tien in morsa i pie,Cravata co un galan che a la lontanaA chi no ga la vista tropo finaPar un piato de pana,O una puina,Bocheta ben stocadaChe par una palada,Tanto de pataconPer pontapeto,Una dose abondante de coletoPiù duro del carton,Che ghe sconde la boca,Manegheti che sfioca,Magnifico topè,Che a la parolaPar un deser da tola,Un cabarè,Lumazza soto el brazzo,Do bei relogi al fiancoCoi so sigili a sguazzo,E co tre quarte almancoDe caena,Una mezza dozzenaAtorno i deiDe vere, rosetoni e de camei,

Canadindia bislonga col pontalE 'l pomolo de azzal,Guanti lustri de pele de cavreto,Scatola da tabaco co l'odor,El so mato ochialetoPer esplorarghe el cuorA qualche bela,Bozzetina da spirito in scarselaDa darghela in tel nasoAi so clientiQuando sucede el casoDe asfisie, convulsion, de svanimenti,Muso da inquisitor,Aria da gran signor,E certi movimenti,Certi sesti che adessoLi chiamaria galantiQualche genio bastardo del progresso,Ma che, per no dir altro, i ze l'indizioDe assae poco giudizio.

E sicome in quei tempi,Ch'essendo pianta esotica el bon senso,El numero dei sempiDir se podeva imenso,L'abito gera queloChe stabiliva l'omo da cartelo,E nela medicina a preferenzaDeterminava i gradi de la scienza,

Cussì sto sìor dotor,Che, se no falo,Se chiamava VetorZampadegalo,

A merito esclusivo del vestiarioEl gera in poco tempo deventà,Mi no ve digo un Creso, un milionario.Ma tanto ben provisto de casnàDa poder sodisfar senza pensieriAi bisogni, ai caprici, ai desideri;

E per sta eloquentissima rason,Che influisce sul grando e 'l picinin.Sora l'omo de sesto e sul melonA disponerghe l'animo al morbin,Vetor Zampadegalo, benchè tondo,Se cazza in testa de zirar el mondo,

Difati a la metà, credo, de magio,Mese per certi istinti predileto,Co quelo che ghe vol se mete in viagio,E col pensier de trovar più dileto,Pien de bizzare idee la fantasia,Se risolve de andar prima in Turchia.

L'ariva a Forapopoli, el desmontaA la nota locanda del Pavero,La zente de servizio trova pronta,Ch'esercita el so basso ministero,Chi descarga i bagagi sul mumento,E chi lo mena nel so apartamento.

Sicome po anca là se vol saverNome, cognome, patria, condizion,E motivo che ariva el forestier,Cussì mezz'ora dopo va el paronCo la lista normal dove che esatiEsser deve indicai tuti sti dati.

Ligio a le discipline sior dotorGhe scrive suso in barbaro toscan:— Mi son Zampadegalo e son Vetor,De domicilio e patria venezian,Son medico spergirico e qua son,Ma no so precisar per che rason;

Per altro posso dir che no me moveSenon el desiderio de viagiar,E dar nel tempo istesso de le proveQuanto valente sia nel medicar,Se per fortuna soa se combinasseDove capito mi che i se amalasse.

Go col valor de le ricete mieGuario neorisme, tisi polmonari,Congestion cerebrali, idropisie,Tifi, maligni, cancari, catari,E tanti ò risanà che gera staiDa più colpi centrali incomodai;

Putei, putele de qualunque età,Omeni, done, richi, povareti,Regazze da mario go liberàDa incomodi insolenti e da difeti,

E co l'ogio fumante de fornigoleGo sin fato passar le catorigole. —

El locandier, che za naturalmenteAndando via co la so lista in manA leser el s'à messo atentamenteLa tiritera de quel zarlatan,Propaga dapertuto sul mumentoL'arivo fortunà de sto portento.

Venuda a Forapopoli dì fa,Qualo fusse l'ogetoGnancora se lo sa,S'aveva butà in letoLa contessa Crestina,Muger da cinque mesi al conte Naso,Con una malatia cussì cagnina,Che no ghe gera casoPer quante i ghe ne fasseChe la se risanasse,Anzi, acuratamenteEsaminando,L'andava lentamentePegiorando,E pareva senz'ombra de gravianza,Che 'l mal gavesse sede nela panza,Ma cossa el fusse. e qualo el vero sito,Gera questo el dificile quesito.

El zorno drio che al conte ghe ze stàL'arivo notizià

De sto dotor,Mosso da vero amorPer so muger,Vol sentir un parer,Far una provaSe sto novo Esculapio ghe la trova.

Per poder conseguir pronto l'efetoEl ghe scrive un biglieto,Dove impenindo tre fazzae del fogioNel farghe imenso elogioA la so inarivabile bravura,Col resto de la carta,Che val a dir co la fazzada quarta,Lo prega, lo sconzuraIn tuta pressaDe voler favorir da la contessa,Dandoghe la più esataInformazion de cossa che se trata,E come i se trovava in quei paesiSposi da cinque mesi,Da un medico assistii che sarà doto,Sarà un'arca de scienza,Ma che da l'aparenzaUn stolido, un dindioto,Se lo deve supor,Vestio come che 'l va bislacamente,Cossa per un dotorPoco decente.

Zampadegalo gera ancora in letoCo i ga portà el biglieto,E pronto a la chiamataUrgente del mario,Dopo averse vestio,Dopo aver fataLa solita taoletaDe tre ore,Dove i lo aspetaEl core;E siben la locandaFusse da l'amaladaDistante, a farla granda,Vinti passi de strada,Nonostante in riflesso a la premura,Ma più per un riguardo al so decoro,El tol sto can da toroUna vetura.

Ecola bela e pronta,Eco che drento el monta,Ed ecolo smontàDove che l'è aspeta;El va su de la scala,I ghe va incontro in salaNo ve so dir in quanti,Elo camina avanti,Naso ghe stà dadrioCo un muso da mario,

Che chi ze del mistierGhe vede in testaEl peso d'un pensierChe lo molesta,E a mezzodì sonàQuel gran talento,Fra l'aplauso e 'l contento,Che da chi l'à incontràGhe vien espresso,Fa el so solene ingressoNela camara doveLa povera amaladaInsina da le noveA riceverlo gera preparada,Ossia, megio parlando,La lo stava aspetando,LusingadaD'esser da sto sapiente risanada.

Senza far complimentiCon chi ze là presenti,Subito che l'arivaDomanda a la signoraSe la se sente viva,Se in forze la ze ancora;Ghe ricerca l'età,El nome che la ga;Se prima che sposadaSe fusse al conte Naso

Qualcun per raro casoL'avesse inamorada;Se la ga fato fioi,(Scordandose el biglieto)E certi fati soi,Che a l'omo più indiscreto,El più imprudente,No vegnarave in mente.

El medico curante là presente,Che no gera minchion,Sorpreso estremamente,E co rason,Nel sentir quela gotica figuraA far de ste domande singolari,Che 'l sia deventà mato ga paura,Nonostante in detaglio e in modi chiariSora la malatia, sora la curaSe mete a dirghe su i particolari,Concludendo che 'l mal da quanto el vedeGa drento de la panza fato sede.

Zampadegalo, senza far comentiSu la storia del mal,Nè sui medicamenti,Ghe dà de l'animal,De l'ignorante,Al medico curanteCo improperie de queleDa portar via la pele

Nel modo el più spietatoAnca a chi la gavesse de soato,Stabilindo a dreturaChe 'l l'à precipitada,Che la medicaturaZe falada,Falada de presenza,E che ze in conseguenzaDai rimedi contrari compromessaLa vita de la povera contessa,Se co la so bravuraNo l'afronta el furor de la natura,Perchè la malatia.L'è neta e schieta,Ze quela brufoloide o discresia,A la qual va sogetaLa manza quando el chiloPer virulenta fasiGhe investe el tamburlan del lai sutilo,La falange sensoria ingombra i vasiImpedindoghe el malChe la se ingrossaSe la causa vitalNo vien rimossa.E con pratiche esateNo i ghe rinfresca el late;Che ste so osservazion le lo confermaUn principio narcotico ghe sia

Nel muco sanguinario de l'infermaDa condurla a morir da epizoosia,Ma che drio la corporea esplorazion,Che 'l va a meter in pratica deboto,Darà senza ecezionPreciso un voto.

Dopo sta gran salata,Sta classica parlata,Sagio da formar testo in medicina,Che 'l medico curante à imatonio,De la malada al leto se avicina,E con lu se avicina anca el mario);La osserva atentamenteTirando i sporteloniSenza mai dirghe gnenteVinti minuti boniPer veder de inzucarla,Ossia magnetizzarla,E aver in sta manieraA furia d'esperienzeIndizio se ghe geraIn quele soferenzeLe anomalie che spessoFa martire el bel sesso;Ma avendo fato tutoSenza nissun costruto,Senza nissun efeto,El cambia de progeto,

E adota i esperimenti,I esami sempre staiDa medici valentiPresenti e esercitai,Per poder stabilir,Che l'amalà,Se nol ga da morir,El guarirà;

Sul polso co la dretaEl sona la spinetaPer esser ben sicuroSe a caso el fusse duro,Opur se 'l bate esato,La lengua ghe ispezionaCome membro integral per ogni dona,E po tuto in un tratoEl so gran stetoscopio tira fora,E co la rechia soraEl ghe lo meteDessoto de le piete,Per sentirSe se possa dal palpito nervosoUn principio morbosoStabilirNele concomitanti pulsazionDe l'orta, del polmon,Cuor, coraela,De la milza, e qualch'altra bagatela;

La esamina, la toca,Stando atentoAl vario movimentoDei ochi e de la boca,E co la riflession,Co l'importanza,Che vol la profession,Ghe fa in sostanza,Usando de la massima insistenza,E dei modi prescriti da la scienza,Una esata revistaDa gran naturalistaIn ogni sito,Per poder conseguir qualche profito,Sinatanto che stufadaEsclamà ga l'amalada:— Cossa diavolo me faloSior dotor Zampadegalo! —

El mario testimonio a quela festa,Stando dal leto a debita distanza,Andava via gratandose la testa,E fra el giusto timor, fra la speranza,Che sto dotor sia un'arca de sapienza,Diseva a so muger — abi pazienza,No aver riguardi, no te far paura,Lassa liberamente che 'l laora,Che se a colpir l'ariva la natura,Semo a cavalo, ti la porti fora,

E co le so scientifiche riceteIn pochissimi zorni el te rimete. —

Quando Zampadegalo, che ze esperto,Se sente intimamente persuasoLa vera malatia de aver scoverto,Rivolgendose verso el conte Naso,El spua tre volte, el se schiarisce, el tosse,E po ghe dise su ste bele cosse:Lassando star la zotica ignoranzaDe quel scioco de medico a la cura,Che 'l calo tol in falo per buganza,Che un brusco lo supone una rotura,E tol per una piaga o una cancrenaQuel buso che se ga dadrio la schena;

Lassando star le massime, i aforismi,Da Ipocrate e Galeno tramandai,Che ze secondo mi tanti idiotismi,Roba che no val giusto i so pecai,Perchè ogni malatia la sente adessoL'epidemico influsso del progresso;

Da le mie patologiche esperienzeDai scandagi anotomici localiSul torace, sul ventre e so adiacenze,Dai sintomi linfatico carnali,Dal moto peristaltico che inquietaLa cresta del polmon su l'ala dreta,Da le protuberanze elementari,Che altera el diafragma de l'inferma,

Da l'angustia dei vasi vascolari,Dove la massa fetida se ferma,Se intonaca, se incrostala, se indura,Ribele contumace d'ogni cura,E urtando co furor la polissena(Che ze una nova venaTuta de mia invenzion,Catada foraNele grespe dessoraDel setimo faldonDadrio la vita,Denominà campana)Ghe investe la membrana,E ghe la irita,Mandandoghe in sfaceloL'elastico edifizioA esclusivo servizioDel cervelo,Ossia la bocaportaDe l'arteria central,Co se stropa la qualLa dona è morta;Da sti evidenti dati precursori,Che decompone i umori,E li sparpagna,Generando sicura la magagna,Ma più dal tristo efetoCo lento stilicidio ocasionà

Da un interno difeto,Maligno e parassito,In qualunque sia sitoPenetràNei tubi mercenariDei muscoli lunari,Imperfezion funesta,Che se ghe manifestaAnca de foraNela parte brutal de l'organismo,Trovo la malatia de la signoraUn fiero virulento isterilismo,E par po a mio giudizio,Basà sora le regole più chiare,Che 'l mal sia gentilizio;Gerela forsi sterile so mare? —

Da sto strano complesso de stramboti,Ma sora tuto da la conclusion,Ga podesto capir sina i più idioti,Che Vetor gera un aseno, un bufon,E finia la parlata i l'à pagaCome 'l s'à merita,Anzi, se pol supor, sora la broca,Perchè 'l cigava basta a piena boca.

Una prova ze questa fra le tante,Che no giubila sempre l'ignorante.